च्याटजीपीटी निर्माता ओपेनएआईले आफ्नो चर्चित भिडियो जेनरेसन मोडल ‘सोरा टर्बो’ आम प्रयोगकर्तामाझ उपलब्ध गराएको एक हप्ता पनि बित्न नपाउँदै गुगलले आफ्नो भिडियो जेनरेसन टुल ‘भियो २’ बारे घोषणा गरेको छ ।
भियो २ ले फोर के एआई भिडियो सिर्जना गरिदिनसक्ने गुगलले जनाएको छ । यसले भिडियो जेनरेटर टुलमध्ये सबैभन्दा शक्तीशाली मानिएको ‘सोरा’ लाई समेत पछि पार्ने दाबी गरिएको छ । गुगलको एआई रिसर्च कम्पनी डिपमाइन्डले बनाएको भियो २ ले मानिस, जनावर र प्रकृतिका अति-वास्तविक लाग्ने क्लिपदेखि एनिमेटेड भिडियोहरू बनाइदिन सक्छ ।
प्रयोगकर्ताहरूले ‘भिडियोएफएक्स’मार्फत भियो २ मा साइन अप गर्न सक्ने गुगलले जनाएको छ । गुगलले सार्वजनिक गरेको ब्लगमा भियो २ ले बनाएका उच्च गुणस्तरका भिडियो क्लिपहरू उदहारणका रूपमा राखिएका छन् । यो टुलले प्राकृतिक र कृत्रिम प्रकाशमा खिचिने भिडियोको फरकपनदेखि फोर के रिजोलुसनसहितको भिडियो बनाइदिनसक्ने उल्लेख गरिएको छ । सोरा टर्बोले भने अधिकतम १०८० पिक्सेल रिजोलुसनमा मात्रै आउटपुट दिन सक्छ ।
