‘पोखरामा हुन लागेको दोस्रो संस्करण अर्न्तगतको अन्तर्राष्ट्रिय माउण्टेन क्रस कन्ट्री प्रतियोगितामा भाग लिन चीनका विभिन्न सहरबाट १ सय १० हाराहारी खेलाडी हिमालय एयरलायन्सको जहाजबाट सिधै पोखरा आउँने जनाइएको छ। यो कार्यक्रमले नेपाल र चीनबिचको मैत्रीपूर्ण सम्बन्धलाई थप सुमधुर हुने बिश्वाश रहेको छ।

नेपाल पर्यटन बोर्डका अनुसार शनिबार पोखरामा हुने कार्यक्रममा नेपालतर्फका १० र चिनकोतर्फका १० वटा टोलीबिच दौड, साइकल र डुंगा प्रतियोगिता हुनेछ । प्रतियोगितामा धावकहरूले दौड, साइकल र फेवातालमा डुंगाबाट गरी ४० किलोमिटरको यात्रा पुरा गर्नुपर्ने छ । पोखराको बराहीघाटबाट सुरू हुने प्रतियोगिता डेभिड फल हुँदै विश्व शान्ति स्तुप पुगेर फेवातालमा डुंगा सयर गरी बराहीघाटमा समापन हुने छ ।

नेपाल र चीनका खेलाडीबिच हुने मैत्रीपूर्ण प्रतिस्पर्धाका साथै व्यक्तिगत दौड प्रतियोगिता अर्न्तगत ३८ किलोमिटर, आम नागरिकका लागि पब्लिक इभेन्ट ५ किलोमिटर र विद्यार्थर्कीा लागि ५ किलोमिटर दौड प्रतियोगिता पनि हुने भएको छ ।

नेपाली र चिनियाँ धावकबिच हुने प्रतियोगितामा प्रथम हुने टिमले ३ लाख ६० हजार रुपैयाँ, दोस्रोले २ लाख ८८ हजार रुपैयाँ, तेस्रोले २ लाख १६ हजार रुपैयाँ, चौथो टिमले १ लाख ४४ हजार रुपैयाँ र पाँचौ हुने टिमले ९० हजार रुपैयाँ पुरस्कार पाउनेछन् ।

यसअघि असार ८ र ९ गते पोखरामा चिनियाँ ड्रागन बोट रेस प्रतियोगिता आयोजना गरिएको थियो । त्यसताका पहिलोपटक पोखरा विमानस्थलमा चिनियाँ खेलाडी विमान चार्टर गरेर पोखरा पुगेका थिए ।